懶床攻防戰

家時有所聞,所謂『假期後症候群』,是一個典型的都市病。範指長假期後,因要再返工返學而感到的焦慮害怕、四肢無力、胃口欠佳、精神緊張等等症狀。今天二〇一七年一月三日,長假期後的第一個工作日返學日,家裡多了一個成員病發:大仔。

秋冬天氣凍,試問又有誰人能夠敵得過溫暖的被窩?說到底毒男爸爸已經幾廿歲人,對這個候群症,已經病重得每日起身返工,已經有焦慮害怕、四肢無力、胃口欠佳、精神緊張等等恆常症狀。但現實歸現實,我典來典去仍然會爬去梳洗,死死氣返工⋯但是,剛病發的小朋友又如何?

今早,一眼望去大仔張床,心知不妙。因為這條大大的懶蟲,很明顯睡醒了,更瞪大眼看著我,面露微笑並擺出一幅奸巧的模樣⋯

其實對這情景,已經有充分的心理準備,對於一個只有三歲多的小朋友,『假期後症候群』比較明顯的徵狀應該是行為比正常粗魯、高聲說話、和諸多藉口不去返學。

果然,望了兩眼,他已經大叫:「爸爸唔好睇住我啦~」

我還了個微笑:「爸爸去換衫返工呀,你要做乜呀?」

「⋯」大懶蟲擺明車馬,由床頭碌到床尾,再由床尾碌回床頭。全程目光沒有離開我,更附送奸笑。

「喂!爸爸換衫返工,你要換衫返學啦。」我認真說。

「我・唔・返!」

這時候,家長們不要大聲責罵,也不要威嚇小朋友,因為這樣只會増添壓力,小朋友更加抗拒,適得其反。就算他們勉強服從予父母的威嚴之下,長遠也會積壓情緒,並非好事。

其實臨近返學之時,我和老婆做了以下幾個工夫,好讓他習慣重返校園之日:

  • 一起做功課:盡量避免在一兩日內完成所有假期功課,要把它們當成日常作業,令小朋友持續返學時的 Routine。就算作業不能每日都有,也盡可能在同一時段,做一些和學習有關的活動。
  • 和同學見面:相約幾個方便的同學仔,一起去逛逛街,食餐飯。不需要大型活動,主要旨在使小朋友不致於忘記學校和同學相處的時光,加強牽絆。
  • 談談新學期:和他看看返學後會學的新課本。但緊記,是勾起他們一點學習興趣,而非學習課文內容。無論是怪獸家長上身或是一時技癢,也不應太過教授課本內容,否則小朋友會失了興趣,也使他們日後上課時因已學習內容而悶極。

以上只是我們盡力,在事前為大仔的心理上做些準備。而面對『我・唔・返!』三個鏗鏘的字眼,我回了個微笑,蹲下來:「尋晩已經講好,爸爸今日同你一齊返。我返工,你返學。」

大仔因為真的答應了,有點軟化。情緒稍有緩和,但一籮藉口隨之而來:「但係我唔想返學喎⋯」

我:「點解唔想返學呀?」

大仔:「因為校車好嘈⋯我唔鍾意嘈喎。」(藉口!)

我:「爸爸可以叫小朋友靜啲,一齊靜啲。」

大仔:「但係校車好搖,我又唔鍾意搖喎。」(另一個藉口!)

我:「爸爸可以叫司機叔叔開車慢啲,搖小啲。」

大仔:「但係同學仔同司機叔叔未必聽爸爸講喎。」(你又啱!)

我唯有轉話題:「記得上次去活動,同學W送了零食比你,你話要返學親自多謝佢喎。」

大仔:「唔,其實呢⋯我覺得佢今日都唔會返學囉⋯」(!)

好!再轉話題:「如果爸爸同你一齊返學吖?」

大仔:「爸爸你唔使返工咩?」(!!)

其實小朋友也很清楚知道他們一定要上學,但扭計是他們的強項,此時耐性比任何方法來得有效。老婆目睹整個過程,事後說我無聊,但我卻很享受這樣的父子互動,對答也有助他邏輯思考的發展。

正當我和大仔陷入『千日戰爭』的無止境對談,樂在其中之時,媽媽一句:「爸爸唔好講啦,你早餐嘅蛋已經準備好啦,你去食啦。」

「哦」我無奈收手,對大仔說「我真係要返工啦」然後轉身離開。但由於大仔已經由扭計懶床轉成嘻哈對話,情緒平靜了,加上用他最愛的蛋做招來,他居然默默地落床,乖乖去換衫食蛋,然後若無其事地返學。

上課時間開始後,翻閲家長群組的對話,發現類似的攻防戰,並非毒男家獨有,其他小朋友,原來也和爸媽來個新年見面禮,在友誼賽中互相角力一番。

在此希望大家有一個豐盛的 2017,透過不同的互動和子女的關係更上一層樓!

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.