童言集:一字之差

久沒寫童言集,並非因為沒提材,倒是笑料太多,笑點高了,難有一些笑爆嘴的場景。直到前陣子有一日,大仔一返到屋企已經急不及待,轉述這個校園趣事給媽媽聽。只因大仔他自己也覺得很攪笑。

今回仍然是言語學習期的笑料。中文裡面,口語的簡單對答題問通常是:

  • 「食唔食飯?」「食!」
  • 「去唔去街?」「去!」
  • 「聽唔聽話?」「聽!」

就是因為這個典型的語法,成為近期笑得最開心的其中一個場景。

未入正題前,先介紹一個新增的趣事主角,老師A。她是在大仔幼稚園學校裡面,一個家長們比較有深刻印象的老師,主要因為她主理學校重要的宗教小組,說話生動又得小朋友歡心。經驗中她很少失手,除了今次⋯

*場地:課室

*年齡:三歲大半(大仔加一班同學仔)

*背景:老師A正和一眾同學仔講解聖經故事,和教授一些相關的宗教生活習慣。

阿仔一放低個書包:「媽媽,今日我地笑得好開心呀!」

媽媽:「係呀?可唔可以分享比媽媽聽先?」

阿仔:「好呀,啫係呢,老師A今日同我地講咗個聖經故事,係話要日日祈禱。」

媽媽心知其實聖經裡面,很多人也會時常祈禱,所以平常心問:「媽媽都知道要祈禱,但有乜特別先?」

阿仔:「老師話要每日祈喎,老師話好難㗎。」特別咬牙切齒加強『每日』都要。

媽媽平淡 Mode:「係呀,所以要有恆心囉。」

阿仔繼續:「係呀然後老師問我地:『要日日祈禱其實要有恆心,唔容易㗎。小朋友你地挑唔挑戰呀?』」

媽媽冷不提防:「係囉,你挑唔挑戰呀?」

「挑!~」阿仔大聲叫起來。

媽媽打個突:「吓?」

阿仔:「全部小朋友都話挑,但老師話『唔係挑,係挑戰呀』。」

媽媽陰陰嘴笑:「老師啱,係挑戰呀。」

阿仔一面老積:「唔係呀,全部小朋友都講『挑』㗎。老師錯囉!」

媽媽已由平淡 Mode 變忍笑 Mode:「點解錯?」

阿仔繼而開始手舞足道的講述當時情況:「因為全部小朋友都大叫『挑挑挑挑挑』,仲跳跳跳跳跳。」

面對大仔如此傳神的演繹,媽媽腦海裡立即浮現全班小朋友一齊做的情景,勁想笑又唔笑得的表情盡顯臉上:「⋯」

阿仔:「媽媽,點解你同老師A一樣樣嘅??」

媽媽:「係咩?⋯⋯嘻嘻⋯」

毒男爸爸已經是第四身由媽媽再轉述給我聽,而我仍然覺得超級好笑。相信面對廿幾位幼稚園小朋友一面跳一面大叫「挑挑挑」,對一位老師來說,畫面應該頗為震撼。老師A也可謂有點老貓燒鬚。

如果老師A無意中看到這篇文章,也請勿介意。因為這個一字之差,只是帶給我們一家嘻嘻哈哈。而且我和老婆研究過,應該只有「挑戰」會有這個戲劇性的效果。應該係,除非唔係。

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.